O rexedor manifestou que «hoxe presentamos as festas de Ribadeo e o primeiro que queremos facer desde o Concello é agradecer todo o traballo á comisión organizadora dos festexos. É importante destacar todo o que fan, como o organizan de ben e iso amosa un amor por Ribadeo».
Para Vega «coordinar unhas festas sempre é complexo: barracas, as orquestras, as actividades alternativas, … É un feixe de traballo e ás veces pouco agradecido. Desde o Concello queremos colaborar con eles e entre todos ter unhas boas festas. E creo que os estamos a facer ben coordinados. Tamén quero agradecerlle á Xunta de Galicia toda esa colaboración económica».
E engadiu que «o que quero tamén é trasladar unha felicitación a todos os veciños e veciñas de Ribadeo. Pasémolo ben, disfrutemos cos amigos e coa familia deste Ribadeo que queremos e amamos todos».
O pregón será pronunciado polo ex alcalde José Carlos Rodríguez Andina, o 1 de setembro, no Teatro. Será presentado polo coñecido xornalista ribadense Fabián Pérez. O 2 de setembro terá lugar o Xara Fest, o primeiro festival de música underground, que se celebra en Ribadeo e que se enmarca dentro da programación das festas patronais.
Gonzalo Lebredo, un dos membros da comisión organizadora, anunciou que «haberá o día dos maiores para achegar os festexos ata a residencia e o centro de día, tamén se celebrará o día do neno, a tradicional sesión de fogos artificiais do 7 e o día grande será o 8 de setembro». Un amplo programa de actividades para todos os públicos se desenvolverá entre o 1 e o 10 de setembro en Ribadeo e no que o deporte tamén estará presente con trofeos de baloncesto, billarda e fútbol, entre outros, así como charangas e orquestras “de moito nivel” como Assia, Magos ou Marbella. Os pratos fortes dos festexos serán Budiño e Magic Queen.
A comisión agradece «a colaboración do Concello, da Xunta, de Estrella Galicia e de todas as persoas e negocios de Ribadeo», que coas súas achegas contribúen á realización das festas patronais de Ribadeo 2023.
