O Concello de Ribadeo aproba 400.000 euros en investimentos

O alcalde de Ribadeo, Daniel Vega, destacou a celeridade coa que están a resolver «temas moi importantes e fundamentais no noso concello». Así, Vega declarou que «a pasada tarde noite celebramos o primeiro pleno ordinario. Creo que foi nun tempo récord, xa que o de organización tivémolo no cuarto día de mandato. Iso significa que lles puxemos solución a moitos problemas, por exemplo licencias urbanísticas que estaban paradas, e nosoutros o que queremos é incentivar a economía local». 

Canto aos investimentos, o rexedor municipal subliñou que «neste pleno aprobamos preto de 400.000 euros para actuacións a realizar en Benestar Social: melloras no centro de día por importe de 50.000 euros, na residencia de maiores do noso concello cunha inversión de 20.000 euros construíndo un espazo no exterior para poder celebrar actividades ou xantar. Creo que é importante mellorar a calidade de vida das persoas que alí residen. E imos adquirir un vehículo para as nosas residencias co obxectivo de contar con transporte propio e non depender de vehículos externos. Aquí a maior parte da subvención ven da Xunta de Galicia, máis 40.000 euros, e nos achegamos aproximadamente 6.000 euros”.

Tamén se aprobaron investimentos en infraestruturas deportivas, pois segundo relatou Vega, «imos actuar no Campo de Outeiro, na Devesa, e tamén no pavillón de deportes de Covelas, cunha inversión total de 80.000 euros. Ao Campo de Outeiro, da Devesa, destinamos 50.000 euros para poder federar o devandito campo e así competir e no caso do pavillón de Covelas o investimento era unha vella demanda». «Actuamos tamén no hangar de piragüismo, entendo que a Deputación vai achegar o total da subvención, pero nós adiantamos 25.000 euros e agardamos que nos veña de volta aos orzamentos do Concello», continuou o alcalde, quen tamén prometeu investimentos na rúa San Francisco e na praza Pancho Maseda. 

O rexedor indicou que «actuamos no ámbito da celebración do Ribadeo Indiano cunha cantidade de 90.000 euros, pero esta cifra é un adianto porque aquí vainos botar unha man a Xunta de Galicia, para non depender tanto dos fondos propios do Concello. E quixemos darlle unha volta á páxina web do Concello, hai que modernizarse e actualizarse e a esta cuestión destinamos 15.000 euros».