Arde o estaleiro de ribeira de San Cibrao

O estaleiro, que contaba con máis de 200 anos de antigüidade e era o único que quedaba na comarca, foi devorado polas lapas e só a rápida intervención do GES de Cervo e dos bombeiros de Viveiro e Barreiros logrou salvar parte do taller. 

Arredor das 3 da madrugada foron varias as chamadas ao 112 Galicia que alertaron do lume. As tarefas de extinción prolongaríanse durante horas, pois había pequenos focos que houbo que atallar. Ata aproximadamente as 8 da mañá non se deron por concluídos os traballos dos bombeiros. 

Afortunadamente, non houbo que lamentar vítimas; pero as lapas calcinaron boa parte da estrutura e os valiosos planos e maquetas que había no seu interior. As consecuencias do incendio son xa irreparables, pois o espazo tiña máis de dous séculos de antigüidade e sete xeracións traballaran nel.